‘மசூதியை இடித்துவிட்டு ராமர் கோவில் கட்டியதில் உடன்பாடில்லை’ – அமைச்சர் உதயநிதி..

0
140

சேலம் மாவட்டத்தில் திமுக இளைஞர் அணி மாநாடு வருகிற 21ஆம் தேதி நடைபெற இருக்கிறது. இந்த மாநாட்டிற்கான சுடர் தொடர் ஓட்டத்தை அண்ணா சாலையில் உள்ள பெரியார் சிலை அருகில் இளைஞரணி செயலாளர் உதயநிதி ஸ்டாலின் இன்று தொடங்கி வைத்தார்.

இந்த சுடர், அண்ணா சாலையில் இருந்து 316 கி.மீ., தூரத்தை கடந்து மாநாடு நடைபெறும் சேலம் மாவட்டத்தை நாளை மறுநாள் பிற்பகல் 1.30 மணி அளவில் சென்றடைகிறது. இந்த சுடர் ஓட்டத்தை தொடங்கி வைத்த பின்னர் அமைச்சர் உதயநிதி ஸ்டாலின் செய்தியாளர்களைச் சந்தித்தார்.

அப்போது பேசிய அவர், “சேலம் மாநாட்டிற்கான அனைத்து ஏற்பாடுகளும் சிறப்பாக செய்யப்பட்டுள்ளன. 3 முதல் 4 லட்சம் இளைஞர்கள் திரண்டு வருவார்கள் என எதிர்பார்க்கிறோம். 316 கி.மீ., சுடர் ஏந்தி தொடர் ஓட்டம் நடைபெறும். அதனை இறுதியாக சேலத்தில் தலைவரிடம் கொடுப்போம்” என்றார்.

தொடர்ந்து பேசிய அவர், “85 லட்சம் கையெழுத்துகள் நீட் தேர்வை விலக்கக்கோரி வாங்கி உள்ளோம். மாநாட்டின்போது அதை திமுக தலைவரிடம் ஒப்படைப்போம். பின்னர் நேரடியாக நானே குடியரசுத் தலைவரை சந்தித்து அதனை வழங்க இருக்கிறேன்.

ராமர் கோவில் திறப்பிற்கோ, அல்லது மத நம்பிக்கைக்கோ திமுக எதிர்ப்பு இல்லை. அங்குள்ள மசூதியை இடித்து விட்டு கோவில் கட்டியதால்தான் திமுகவிற்கு உடன்பாடு இல்லை” எனத் தெரிவித்துள்ளார்.

LEAVE A REPLY

Please enter your comment!
Please enter your name here